কলখাৰ কি দৰে তৈয়াৰ কৰা হয় আৰু ইয়াৰ উপকাৰিতাসমূহ

 

তিনিশ ষাঠি জোপা ৰুবা কল।
মাহেকে পষেকে চিকুণাবা তল।।
পাত পছলা লাভত খাবা।
লংকাৰ বনিজ ঘৰতে পাবা।।

উক্ত ডাকৰ বচন ফাঁকিৰ মতে তিনিশ ষাঠি জোপা কলপুলি ৰুলে বছৰৰ প্ৰত্যেক দিনতে এথুককৈ কল পাব পাৰি যাৰ পৰা জীৱিকা অৰ্জন কৰিব পাৰি আৰু লগতে কলগছৰ পাত আৰু পচলাও পাব পাৰি| লগতে এই বচন ফাঁকিত এইটোও নিৰ্দেশ আছে যে মাহেকে পষেকে গছৰ তলবোৰ চিকুনাব লাগে|

 অসমীয়া জনজীৱনত কলগছৰৰ ব্যৱহাৰ অপৰিহাৰ্য্য| কলক কেৱল মাত্ৰ যে ফল হিচাপে খোৱা হয় তেনে নহয়|কলপাত, কলপতুৱা সকাম-নিকাম আদিত ব্যৱহাৰ কৰাৰ লগতে কলদিল আৰু কলপচলা ৰান্ধি খোৱা হয়| পূজা পাৰ্বন ইত্যাদিত কলৰ ব্যবহাৰ বিশেষকৈ চেনিকলৰ চাহিদা বেছি| 

কল কেৱল খাই বাকলি পেলাই দিয়া হয় তেনে নহয়, ভীম কল আৰু আঠিয়া কলৰ বাকলি শুকোৱাই ৰখা হয় আৰু পিছত ইয়াক জুইত পুৰি খাৰ বনোৱা হয়|এনেকৈ কলৰ বাকলি শুকোৱাই খাৰ বনোৱাৰ নিয়ম অন্য কোনো ৰন্ধনশৈলীত আছে নে সেয়া কব নোৱাৰি কিন্তু খাৰ অসমীয়া ৰন্ধনশৈলিৰ এটি অতিকে অনন্য উপাদান| অসমীয়াসকলে খাৰ অতিজৰে পৰা খাই আহিছে আৰু জনাযায় যে অতিতত যেতিয়া নিমখত আৱিৰ্ভাব হোৱা নাছিল তেতিয়া নিমখৰ সলনি খাৰৰ ব্যবহাৰ কৰা হৈছিল |

খাৰৰ বিভিন্ন বিধিৰ ভিতৰত অমিতাৰ খাৰ বৰ জনপ্ৰিয়| অমিতাৰ উপৰিও বিভিন্ন পাচলি, দাইল বা মাছৰো খাৰ বনাই খোৱা হয়| খাৰ কেঁচাকৈয়ো খাব পাৰি| কেঁচাকৈ খাবলৈ দুচামোচ খাৰত নহৰু কাটি নিমখ আৰু মিঠাতেল মিহলাই ভাতৰ লগত পৰিবেশন কৰা হয়| খাৰৰ তৰকাৰীখন ভাতৰ লগত আৰম্ভনিতে খোৱাৰ নিয়ম| 

To know how to make Khar (in English) click here

কলখাৰ বনোৱাৰ পদ্ধতি :

উপকৰন:

• দুটা ভীম বা আঠিয়া কলৰ বাকলি
• 2 কাপ পানী

প্ৰনালী:

1. ভীম কল বা আঠিয়া কলৰ বাকলি কেইদিন মান ৰদত শুকোৱাই লব|
2. এটা পাত্ৰত পানী লব|এতিয়া কলৰ শুকান বাকলি কেইখন জুইত পুৰি লব|
3. পুৰা হলে লগে লগে পানীত পাত্ৰটোত দি দিব আৰু চামুচ এখনৰে মিহলি কৰি ঠাণ্ডা হবলৈ দিব|
4. ঠাণ্ডা হোৱাৰ পাছত চেকনিৰে চেকি পানী খিনি বটলত চেকি লব| বাকী খিনি পেলাই দিব|
5. বটলৰ সাফৰ টানকৈ মাৰি থব| এনেকৈ কেইবা মাহো থব পাৰি | প্ৰয়োজন হলে বটলৰ পৰা খাৰ ব্যবহাৰ কৰিব | যি কোনো খাৰৰ ব্যঞ্জনত এক বা দুই চামুচেই যথেষ্ট|

খাৰৰ উপকাৰিতা :

অসমীয়া সমাজত খাৰ খোৱাৰ পৰম্পৰা অতিজৰে পৰা চলি আহিছে যাৰ বাবে অসমীয়া সকলক খাৰখোৱা বুলিও কোৱা হয় | খাৰৰ কিছুমান ঔষধি গুণ আছে বুলি ধৰা হয় সেয়েহে মাহেকে পষেকে খাৰ খোৱাৰ নিয়ম| খাৰে পেট চফা কৰে বুলি জনা যায় | খাৰ খালে যি কোনো পেটৰ অসুখৰ পৰা আঁতৰি থাকিব পাৰি |